Ég heiti Heiðdís Buzgò og er íslensk myndlistarkona, myndlísir, teiknari og grafískur hönnuður.

 

Frásögn í myndum hefur alltaf heillað mig og ég hef fundið leið til að sameina ástríðu mína fyrir sögum og ævintýrum við nútímalega nálgun á hönnun og myndsköpun. Í verkum mínum leita ég jafnvægis milli hefðar og nýsköpunar, milli fortíðar og framtíðar, þar sem myndirnar sjálfar verða brú sem bjóða áhorfandanum inn í sögur sem eru bæði mínar eigin og opnar fyrir túlkun annarra.

 

Nám mitt hófst í Myndlistaskólanum í Reykjavík, þar sem ég lauk fornámi árið 2017. Síðar flutti ég til Akureyrar og útskrifaðist þaðan árið 2023 sem grafískur hönnuður með diplómu og starfsréttindi.

 

Nú bý ég í Valencia á Spáni þar sem ég hef lokið meistaranámi í hugmyndateikningu (2D Concept Illustration) við Universal Arts School. Þar hef ég dýpkað skilning minn á því hvernig hægt er að þróa persónur, umhverfi og heilu heima sem lifna við fyrir augum fólks og hentar það hvaða söguframsetningu sem er í víðu listasviði.

 

Á undanförnum árum hef ég tekið þátt í fjölbreyttum verkefnum. Ég hef myndskreytt bækur og hannað leikskrár, plötuumslög, plaköt og grafískt efni fyrir ýmsa viðburði, þar á meðal bæjarhátíðir Akureyrarbæjar.

 

Mér finnst alltaf jafn spennandi að takast á við nýjar áskoranir þar sem ég get nýtt bæði sköpunarkraft og tæknilega færni til að styðja við söguna eða skilaboðin sem á að miðla.

 

Oft segir ein mynd meira en þúsun orð. Hún er leið til að túlka sögu, skapa stemningu og opna dyr að nýjum heimum. Ég hef alltaf dregist að þjóðsögum og ævintýrum, ekki bara vegna þess að þær eru fallegar sögur, heldur vegna þess að þær búa yfir djúpum táknrænum krafti sem heldur áfram að tala til okkar í dag. Með myndum mínum reyni ég að fanga þann kraft og færa hann inn í nútímann og brúa þannig bil fyrri kynslóða til okkar.

​

​